ایران کا سیٹلائٹ لے جانے والے راکٹ ’’ ذوالجناح‘‘ کا کامیاب تجربہ

عالمی خبر رساں ادارے کے مطابق ایران کے وزارت دفاع اور مسلح افواج کی رسد کی وزارت نے دعویٰ کیا ہے کہ ایران نے مصنوعی سیارہ لے جانے والے راکٹ ’’ ذوالجناح‘‘ کا مدار کے نیچے کا تجربہ مکمل کرلیا ہے۔

ایران کے سرکاری ٹیلی ویژن نے ایک صحرا میں داغے جانے والے راکٹ کی فوٹیجز نشر کی تھیں تاہم یہ واضح نہیں ہے کہ یہ لانچ کب اور کہاں کی گئی ہے تاہم مہیا کی گئی تفصیلات کے مطابق یہ راکٹ 220 کلوگرام وزنی مصنوعی سیارے کو 500 کلومیٹر تک لے جاسکتا ہے۔

ترجمان کا مزید کہنا تھا کہ ذوالجناح اپنے ٹیسٹ لانچوں کو حتمی شکل دینے کے بعد آپریشنل سیٹلائٹ کو مدار میں رکھ سکے گی، اور اسے موبائل لانچنگ پیڈ سے لانچ کیا جاسکتا ہے۔

ترجمان احمد حسینی نے ایک سوال کے جواب میں واضح کیا کہ ایٹمی پروگرام کی طرح اس کے سیٹلائٹ پروگرام کا مقصد بھی پُرامن ہے۔

امریکا اور دیگر مغربی طاقتوں نے خدشہ طاہر کیا ہے کہ ایران ان ٹیکنالوجی کی مدد سے عسکری استعداد میں اضافہ کر رہا ہے اور ان سب تجربات کا مقصد جوہری ہتھیاروں کی تیاری ہے۔

واضح رہے کہ اپریل 2020 میں ایران کے اسلامی انقلابی گارڈ کور نے دو ناکام لانچوں اور لانچ پیڈ راکٹ دھماکے کے بعد ملک کا پہلا بحری جنگی سیٹلائٹ ’’نور‘‘ کامیابی کے ساتھ لانچ کیا تھا۔