عمران خان کے جلسے کا بہانہ، بول نیوز بنا حکومتی انتقام کا نشانہ

پیمرا نے عمران خان کی تقاریر دکھانے پر بول نیوز کی نشریات ایک بار پھر معطل کر دی ہیں۔

تفصیلات کے مطابق پاکستان الیکٹرانک میڈیا ریگولیٹری اتھارٹی (پیمرا) نے بول نیوز کی نشریات 3 روز کیلئے معطل کر دی ہیں۔

پیمرا نے بول نیوز پر موثر تاخیری نظام کے استعمال نہ کرنے کا الزام عائد کیا ہے جبکہ بول نیوز نے تاخیری نظام کو انتہائی موثر انداز سے پیش کیا، چینل پر جلسوں میں عمران خان کے خطاب کو ریکارڈڈ نشر کیا جاتا رہا۔

پی ٹی آئی رہنماؤں کا ردعمل

پیمرا کے فیصلے پر پی ٹی آئی کے سینئر رہنما فواد چوہدری نے سماجی رابطے کی ویب سائٹ ٹوئٹر پر کہا کہ عمران خان کی تقریر نشر کرنے کی پاداش میں بول نیوز کی بندش پاکستان میں اظہار آزادی کی حالت زار بتا رہی ہے۔

ان کا کہنا تھا کہ یوں لگتا ہے عدالتیں بے بس ہیں اور قانون لاچار ہے۔

انہوں نے مزید کہا کہ ہم اس بندش کی شدید مذمت کرتے ہیں۔

عمران خان کی تقریر نشر کرنے کی پاداش میں @ARYNEWSOFFICIAL اور @BoLNews_Alert کی بندش پاکستان میں اظہار آزادی کی حالت زار بتا رہی ہے، یوں لگتا ہے عدالتیں بے بس ہیں اور قانون لاچار، ہم اس بندش کی شدید مذمت کرتے ہیں https://t.co/fXaaU94PKo

— Ch Fawad Hussain (@fawadchaudhry) September 15, 2022

اس کے علاوہ پی ٹی آئی کے رہنما فیصل جاوید خان نے بھی ٹوئٹر پر جاری کردہ اپنے ایک پیغام میں کہا کہ بول نیوز کی نشریات کو پھر بند کر دیا گیا ہے، امپورٹڈ حکومت کی جانب سے آزادی صحافت پر تابڑ توڑ حملے جاری ہیں۔

فیصل جاوید نے کہا کہ آخر کیا جرم سرزد کر دیا بول نیوز نے جو اسے بند کر دیا گیا؟

انہوں نے مزید کہا کہ بول نیوز کو حق اور سچ کی آواز اٹھانے اور عوام کی پکار کو نشر کرنے جیسے سنگین جرائم کی سزا دی جا رہی ہے۔

اے آر وائے نیوز اور بول نیوز کی نشریات کو پھر بند کر دیا – امپورٹڈ حکومت کی جانب سے آزادی صحافت پر تابڑ توڑ حملے جاری – آخر کیا جرم سرزد کر دیا ان چینلز نے – حق اور سچ کی آواز اٹھانا – عوام کی پکار کو نشر کرنا جیسے سنگین جرائم کے مرتکب ہوئے یہ دونوں چینلز #امپورٹڈ_حکومت_نامنظور

— Faisal Javed Khan (@FaisalJavedKhan) September 15, 2022