وزیر خارجہ بلاول بھٹو زرداری نے کہا ہے کہ ہمیں اس موسمیاتی تباہی سے بچنے کیلئے عالمی برادری کی معاونت درکار ہے۔
تفصیلات کے مطابق جرمن وزیر خارجہ نے سیلاب متاثرین کیلئے مزید ایک کروڑ یورو کی امداد کا اعلان کرتے ہوئے کہا کہ پاکستان میں سیلاب سے کس قدر تباہی ہوئی، اندازہ لگانا مشکل ہے۔
جرمن وزیر خارجہ کا کہنا تھا کہ پاکستان میں سیلاب متاثرین کھلے آسمان تلے زندگی گزارنے پر مجبور ہیں، سیلاب سے متاثر بچے بھی کھلے آسمان تلے زندگی گزار رہے ہیں، سیلابی پانی سے بننے والے مچھر ملیریا کا سبب بن رہے ہیں۔
ان کا کہنا تھا کہ پاکستان موسمیاتی تبدیلیوں کی وجہ سے سب سے زیادہ متاثر ہو رہا ہے، جرمنی پاکستان کا اہم ترین تجارتی شراکت دار ہے، جرمن کمپنیاں پاکستان میں انفراسٹرکچر منصوبوں میں سرمایہ کاری کر رہی ہیں، جرمنی پاکستان کے ساتھ دو طرفہ تعلقات مضبوط کرنے کا خواہاں ہے، ہم نے افغانستان کے بہت سارے لوگوں کو بھی جرمنی میں پناہ دی ہے۔
وزیر خارجہ بلاول بھٹو زرداری کا اس موقعے پر کہنا تھا کہ مہمان نوازی پر جرمنی کا شکر گزار ہوں، پاکستان اور جرمنی کے تعلقات مضبوط ہوتے جا رہے ہیں، پاکستان میں مون سون جون کے وسط میں شروع ہو کر اگست کے اختتام تک جاری رہی، پاکستان اور جرمنی کے درمیان بہترین سفارتی تعلقات ہیں۔
بلاول بھٹو نے کہا کہ پاکستان اس وقت سیلاب کی صورتحال میں مشکل ترین حالات سے گزر رہا ہے، تباہ کن سیلاب نے پاکستان میں تاریخ کی بڑی تباہی پھیلائی ہے، سیلاب سے متاثر علاقوں میں سیلابی پانی سے مختلف بیماریاں پھیل رہی ہیں، مون سون سیزن میں شدید بارشیں ہوئیں جس سے سیلابی صورتحال پیدا ہوئی۔
ان کا کہنا تھا کہ پاکستان کا ایک تہائی رقبہ سیلاب سے شدید متاثر ہوا، پاکستان موسمیاتی تبدیلی سے شدید ترین متاثر 10 ممالک کی فہرست میں شامل ہے، سیلاب سے 3 کروڑ 30 لاکھ افراد براہ راست متاثر ہوئے، موسمیاتی تبدیلی کی وجہ سے بننے والی گرین گیسز میں پاکستان کا حصہ ایک فیصد سے بھی کم ہے۔
انہوں نے مزید کہا کہ پاکستانی طلبا کیلئے جرمنی ایک بہترین ملک ہے، ہمیں اس موسمیاتی تباہی سے بچنے کیلئے عالمی برادری کی معاونت درکار ہے، پاکستانی کمیونٹی کی بڑی تعداد جرمنی میں رہ رہی ہے، افغانستان کو بھی یوکرین کی طرح عالمی مدد چاہیے، یورپی یونین میں جرمنی پاکستان کا سب سے بڑا تجارتی شراکت دار ہے۔