گزشتہ حکومت نے چار سال میں ملکی معیشت کو تباہ کر دیا، بلال اظہر

وزیراعظم کے معاون خصوصی برائے معیشت بلال اظہر کیانی نے کہا ہے کہ گزشتہ حکومت نے چار سال میں ملکی معیشت کو تباہ کر دیا۔

وزیراعظم کے معاون خصوصی برائے معیشت بلال اظہر کیانی نے جہلم میں میڈیا سے گفتگو کرتے ہوئے کہا کہ عمران خان کی حکومت نے جاتے جاتے آئی ایم ایف کے پروگرام کو بھی روکے رکھا، گزشتہ حکومت ایسے حالات پیدا کر گئی جو سری لنکا جیسے ہیں۔

بلال کیانی نے کہا کہ ہماری حکومت نے ملکی معیشت کو بچانے کیلیے مشکل فیصلے کیے، خدشہ تھا کہ جس طرح سری لنکا کے حالات تھے ہمارے ملک کے بھی حالات ایسے نا ہو‌ں، حکومت کے ساتھ عوام کو بھی مشکلات کا سامنا کرنا پڑ رہا ہے، کوشش ہے کے جلد سے جلد مہنگائی پر بھی قابو پا لیا جائے اور ڈالر کی قیمت کو بھی کنٹرول کیا جائے۔

ان کا کہنا تھا کہ ہماری کوشش ہو گی کے سیلاب متاثرین کی بحالی کیلئے جامع حکمت عملی تیار کی جائے اور اقدامات اٹھائے جائیں، سیلاب متاثرین کے ہونے والے نقصانات کے ازالے کیلئے بھی حکمت عملی تیار کی جا رہی ہے، سیلاب سے متاثرہ افراد کیلئے فوری طور پر فی خاندان 25000 روپے امداد حکومت کی طرف سے جاری کی جا چکی ہے۔

انہوں نے کہا کہ سیلاب متاثرین کی بحالی کیلئے وزیراعظم متاثرہ علاقوں کا دورہ کر رہے ہیں، نیشنل فلڈ رسپانس اینڈ کوآرڈینیشن سینٹر نام کا ایک ادارہ قائم کیا گیا ہے جس کی نگرانی وزیراعظم شہباز شریف خود کر رہے ہیں۔

بلال کیانی نے کہا کہ 70٪ شہری 100 سے 300 یونٹ ماہانہ استعمال کرتے ہیں، وزیر اعظم پاکستان نے 200 یونٹ ماہانہ استعمال کرنے پر ریلیف بھی دیا ہے۔