عمران خان کی قیادت میں تحریک انصاف کی ریلی ایف نائن پارک کی جانب رواں دواں ہے۔
پاکستان تحریک انصاف کے کارکنان کی بڑی تعداد ایف نائن پارک پر جمع ہوگئی جبکہ ریلی میں شرکت کیلئے عمران خان بھی شہباز گل سے اظہار یکجہتی کیلئے ایف نائن پارک پہنچ گئے۔
شہباز گل نے بتایا عمران خان کی زندگی کو شدید خطرہ ہے،مرادسعید
مرادسعید نے کہا ہے کہ شہباز گل نے بتایا عمران خان کی زندگی کو شدید خطرہ ہے۔
تحریک انصاف کے رہنما مراد سعید نے اسلام آباد میں ریلی سے خطاب کرتے ہوئے کہا کہ دنیا میں ایسا کون سا قانون ہے جو ملاقات کیلئے روکتا ہے، شہبازگل پر جسمانی اور ذہنی تشدد کیا گیا ہے، بتایا جائے شہباز گل پر کس قانون کے تحت تشدد کیا گیا؟
انہوں نے کہا کہ شہبازگل نے مجھے بتایا کہ پوری رات مجھے سانس لینے میں دشواری رہی، شہبازگل نے بتایا کہ میں علاج کیلئے چیختا رہا لیکن کوئی نہیں آیا اور شہباز گل نے یہ بھی بتایا عمران خان کی زندگی کو شدید خطرہ ہے۔
مراد سعید نے یہ بھی کہا کہ سمیع ابراہیم اور دیگر صحافیوں پر تشدد اورمقدمات درج کیے گئے، عمران خان نے امریکا کو اڈے دینے سے انکار کیا، عمران خان نے کہا عوام کیلئے فیصلے کرنے ہیں آپکی خوشی کیلئے نہیں۔
ان کا کہنا تھا کہ رجیم چینج کو ہم سب مسترد کرچکے ہیں جبکہ امریکی غلامی اور امپورٹڈ حکومت کو ہم نا منظور کرچکے ، قوم نے عمران خان کے ساتھ مل کر امپورٹڈ حکومت کو شکست دیدی۔
تحریک انصاف کے رہنما مراد سعید کا مزید کہنا تھا کہ جنگ آخری مرحلے میں ہے، کچھ بھی کرلیں پاکستانی آپ کی دھمکیوں سے نہیں جھکیں گے اور اگر عمران خان کو ہٹانے کی کوشش کی تو پردہ چاک ہوجائے گا۔