چیئرمین سینیٹ نےکہا ہے کہ پاکستان امریکہ کے ساتھ دوطرفہ، طویل مدتی اور کثیر الجہتی پائیدار تعلقات کا خواہاں ہے۔
تفصیلات کے مطابق امریکی کانگریس وفد نے پارلیمنٹ ہاؤس کا دورہ کیا جہاں انہوں نے چیئرمین سینیٹ اور اسپیکر قومی اسمبلی سے ملاقات کی۔
امریکی کانگریس میں پاکستانی کاکس کی چیئرپرسن کانگریس وومن شیلا جیکسن، کانگریس مین آل گرین، رکن کانگریس تھامس سوازی اور پاکستان میں متعین امریکی سفیر ڈونلڈ بلَوم پر مشتمل امریکی وفد کی چیئرمین سینیٹ محمد صادق سنجرانی سے ملاقات کے موقع پر اسپیکر قومی اسمبلی راجہ پرویز اشرف، ڈپٹی چیئرمین سینیٹ مرزا محمد آفریدی، سینیٹر اعظم خان سواتی اور سینیٹر دلاور خان بھی ملاقات میں موجود تھے۔
اس موقع پر چیئرمین سینیٹ نے امریکی وفد کے اعزاز میں عشائیہ کا اہتمام کیا جبکہ چیئرمین سینیٹ نے اراکین کانگریس کے دورہ پاکستان کا خیرمقدم کیا۔
چیئرمین سینیٹ نے امریکی وفد کو حالیہ شدید بارشوں کے نتیجے میں پیدا ہونے والی سیلابی صورت حال سے متعلق آگاہ کیا۔
صادق سنجرانی نے کہا کہ سیلابی صورت حال سے نمٹنے کیلئے امریکی تعاون پر شکر گزار ہیں، موجودہ صورت حال میں یو ایس ایڈ کی سیلاب متاثرین کے لیے امداد نہایت اہمیت کی حامل ہے۔
چیئرمین سینیٹ نے امید ظاہر کی کہ یہ دورہ پاکستان اور امریکہ کے تعلقات کو مزید گہرا کرنے کا باعث بنے گا،دورہ دونوں ممالک کی پارلیمانوں کے درمیان تعلقات کو مضبوط بنانے میں بھی اہم کردار ادا کرے گا جبکہ دونوں ممالک کے درمیان مزید اعلیٰ سطحی تبادلے تعلقات کو مزید مضبوط بنانے میں کارگر ثابت ہونگے۔
صادق سنجرانی کا کہنا تھا کہ پاکستان امریکہ کے ساتھ دوطرفہ، طویل مدتی اور کثیر الجہتی پائیدار تعلقات کا خواہاں ہے،تیزی سے بدلتی ہوئی علاقائی صورتحال میں امن امان کے قیام کیلئے مذاکرات کا راستہ اپنانا ہوگا۔
چیئرمین سینیٹ محمد صادق سنجرانی نے پاکستان، امریکہ دوطرفہ تجارتی اور اقتصادی تعلقات کو مضبوط بنانے پر زور دیا اور کہا کہ صحت، سیکیورٹی، انسداد دہشت گردی اور موسمیاتی تبدیلیوں سے نمٹنے کیلئے تعاون ناگزیر ہے۔
امریکی وفد نے حالیہ سیلاب کی وجہ سے ہونے والے جانی و مالی نقصان پر افسوس کا اظہار کیا اور کہا کہ اس مشکل وقت میں پاکستانی حکومت اور عوام کے ساتھ کھڑے ہیں۔
امریکی وفد کا مزید کہنا تھا کہ قدرتی آفات سے نمٹنے کے لیے پاکستان کی امداد جاری رکھیں گے،خطے میں امن امان کے قیام کیلئے پاکستان نے کلیدی کردار ادا کیا ہے۔