پاکستان تحریک انصاف کے چیئرمین عمران خان نے کہا ہے کہ میری قوم ایک زندہ قوم بن چکی ہے۔
تفصیلات کے مطابق پی ٹی آئی چیئرمین عمران خان نے بہاولپور میں ہونے والے پارٹی کے جلسے سے خطاب کرتے ہوئے کہا کہ بہاولپور آکر مجھے بہت خوشی ہوئی ہے۔
ہماری قوم ایک زندہ قوم بن چکی ہے
عمران خان نے کہا کہ ہماری قوم ایک زندہ قوم بن چکی ہے، یہ ایک عظیم قوم بننے جا رہی ہے، اللہ نے میری قوم کو بیدار کر دیا ہے۔
لوٹوں کے دن ختم ہو گئے ہیں
چیئرمین پی ٹی آئی نے کہا کہ ساڑھے 3 سال حکومت میں بیٹھ کر عیاشی کرتا ہے اور پھر لوٹا بن جاتا ہے، مجھ سے وعدہ کریں آپ نے اس لوٹے کو کبھی کامیاب ہونے نہیں دینا ہے، لوٹوں کے دن ختم ہو گئے ہیں۔
ان کا کہنا تھا کہ ضمیر فروشوں کے دن پرانے پاکستان میں رہ گئے، مخالفین بھی قائد اعظم کو صادق اور امین سمجھتے ہیں، صرف ایک آزاد قوم کی پرواز اوپر ہوتی ہے، وعدہ کریں آپ کبھی اللہ کے سوا کسی کے سامنے نہیں جھکیں گے۔
لندن میں اربوں کے فلیٹس مریم نواز کے نام پر ہیں
انہوں نے کہا کہ شہباز شریف ساری قوم تو محنت کر رہی ہے لیکن آپ تو چوری کر کے سارا پیسہ باہر لے کر جار ہے ہیں، پانامہ لیکس کے بعد پتا چلا کہ لندن میں اربوں کے فلیٹس مریم نواز کے نام پر ہیں۔
عمران خان نے کہا کہ میں آپ کو حقیقی آزادی کی تحریک کیلئے تیار کر رہا ہوں، جب حکمران قوم کا پیسہ چوری کرتے ہیں تو ملک تباہ ہو جاتے ہیں، ملک پر تھری اسٹوجز مسلط ہیں، ملک کی بڑی بیماری آصف علی زرداری، فضل الرحمان مذہب کو اپنے مفاد کیلئے استعمال کرتے ہیں۔