وزیر بلدیات سید ناصر حسین شاہ نے کہا ہے کہ عمران خان کا وفاق کے ساتھ سندھ حکومت بنانے کا خواب مضحکہ خیز ہے۔
تفصیلات کے مطابق وزیر بلدیات سید ناصر حسین شاہ نے عمران خان کے بیان پر ردعمل دیتے ہوئے کہا کہ عمران کی سندھ والی ٹیم صرف سرکس میں کام کر سکتی ہے سیاست میں نہیں، سارا دن جگتیں کرنے والے سیاسی مسخرے رسوائی کے سوا کچھ حاصل نہیں کر سکتے۔
ان کا کہنا تھا کہ عمران چاہتا ہے سب نااہل ہو جائیں اور وہ اکیلے اقتدار میں آجائے، خان نے جو بویا ہے وہی کاٹ رہا ہے،
انہوں نے مزید کہا کہ عمران کا کراچی کے ساتھ سوتیلی ماں والا سلوک کراچی والوں کو یاد ہے، حیرت ہے جو قانون کی عزت نہیں کرتا وہ وکلا کے پاس خطاب کرنے گیا ہوا ہے۔
واضح رہے کہ پی ٹی آئی چیئرمین عمران خان نے بلدیاتی کنونشن سے خطاب کیا جس میں انہوں نے کہا کہ میں بلدیاتی امیدواروں کو مبارکباد دیتا ہوں، اپنے امیدواروں کو بتانا چاہتا ہوں کہ کراچی تحریک انصاف کا شہر ہے۔
ان کا کہنا تھا کہ پاکستان میں کراچی کے لوگ سب سے زیادہ سیاسی شعور رکھتے ہیں، پاکستان میں تمام سیاسی تحریکیں کراچی سے اٹھتی تھیں، کراچی پاکستان کی قیادت کرتا تھا۔
انہوں نے کہا کہ میں چاہتا ہوں کراچی دوبارہ پاکستان کی قیادت کرے کیونکہ کراچی پاکستان کا معاشی حب بھی ہے، کراچی کی خوشحالی پاکستان کی خوشحالی ہے۔
عمران خان نے کہا کہ اس بار تحریک انصاف وفاقی حکومت میں بھی آئے گی اور سندھ کی حکومت بھی ہماری ہو گی، اگلی بار ہم سندھ میں اپوزیشن میں نہیں بیٹھیں گے۔