پی پی پی شعبہ خواتین کی مرکزی صدر و ایم پی اے فریال تالپور نے کہا ہے کہ عالمی برادری سے ماحولیاتی انصاف کے خواہاں ہیں۔
تفصیلات کے مطابق ایم پی اے فریال تالپور سے برطانوی ڈپٹی ہائی کمشنر سارہ مونی نے زرداری ہاوَس کراچی میں ملاقات کی جس کے دوران سندھ میں سیلاب کی صورتحال اور متاثرین کی بحالی سمیت دلچسپی کے باہمی امور پر تبادلہ خیال ہوا۔
ملاقات میں صوبائی وزراء نے غیر معمولی بارشوں کے بعد ہونے والے حالات کے پسمنظر میں اپنے محکموں کو درپیش چیلنجز اور اٹھائے گئے اقدامات سے آگاہ کیا۔
فریال تالپور کا اس موقعے پر کہنا تھا کہ برطانوی حکومت کی جانب سے پاکستان کو مشکل گھڑی میں ساتھ دینا مضبوط دو طرفہ دوستانہ تعلقات کی دلیل ہے۔
ان کا کہنا تھا کہ پاکستان میں غیر معمولی بارشیں موسمیاتی تبدیلیوں کا نتیجہ ہیں، عالمی برادری سے ماحولیاتی انصاف کے خواہاں ہیں۔
ملاقات میں سندھ کے وزراء ڈاکٹر عذرا فضل پیچوہو، سعید غنی، جام خان شورو اور سید سردار شاہ، ارکانِ سندھ اسمبلی سہیل انور سیال، قاسم سراج سومرو، سعدیہ جاوید اور پرونشل ڈزاسٹر مینجمینٹ اتھارٹی کے ڈائریکٹر جنرل سلمان شاہ نے شرکت کی۔