عوامی نیشنل پارٹی (اے این پی) کے رہنما اور قومی اسمبلی کے حلقے این اے 31 کے ضمنی انتخابات میں پاکستان تحریک انصاف کے چیئرمین عمران خان کے مدمقابل امیدوار غلام احمد بلور نے کہا ہے کہ صوبائی حکومت نے مجھے ہروایا ہے۔
سماجی رابطے کی ویب سائٹ ٹوئٹر پر اپنے ایک پیغام میں غلام احمد بلور نے کہا کہ جھوٹی خبریں پھیلانے سے گریز کریں، میں نے کسی صورت شکست قبول نہیں کی، اب یہ تماشا ختم ہونا چاہیے۔
ان کا کہنا تھا کہ ہم سخت ردعمل کا اظہار کریں گے، اس بارے میں اپنے لوگوں سے مشورہ کریں گے۔
انہوں نے مزید کہا کہ پشاور ہائی کورٹ جائیں یا الیکشن کمیشن، مینڈیٹ لوٹ مار کی اجازت نہیں دیں گے۔
Avoid spreading false news, I have not accepted defeat in any way, now this spectacle must be over, we will have a strong reaction, will consult my people, whether to go to Peshawar High Court or Election Commission, will not allow to rob our mandate.#PeshawarBilourKa https://t.co/iSoLqNIS6E
— Ghulam Ahmad Bilour (@GhulamABilour) October 16, 2022
واضح رہے کہ این اے 31 پشاور کے تمام 265 پولنگ اسٹیشنز کے غیر حتمی غیر سرکاری نتائج الیکشن کمیشن کو موصول ہو چکے ہیں۔
غیر حتمی نتیجے کے مطابق عمران خان 57 ہزار 824 ووٹ حاصل کر کے کامیاب ہو گئے ہیں، اے این پی کے غلام احمد بلور 32 ہزار 253 ووٹ حاصل کر کے دوسرے نمبر پر رہے اور جماعت اسلامی کے محمد اسلم 3 ہزار 817 ووٹ لیکر تیسرے نمبر پر رہے۔
این اے 31 پشاور میں ووٹر ٹرن آؤٹ 20.28 فیصد رہا۔