آرمی چیف نے کہا ہے کہ شوٹنگ میں مہارت بنیادی فوجی تربیت کا اہم مقصد ہے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے جہلم گیریژن کا بھی دورہ کیا جہاں انہوں نے آرمی رائفل ایسوسی ایشن کی تقریب میں شرکت کی۔
آئی ایس پی آر کے مطابق مقابلوں میں تینوں مسلح افواج ، قانون نافذ کرنے والے اداروں اور سویلین نے شرکت کی جبکہ پاک فضائیہ کے سربراہ ایئرچیف مارشل ظہیر احمد بابر نے بطور گیسٹ آف آنر شرکت کی۔
آئی ایس پی آر کا کہنا ہے کہ انٹر فارمیشن مقابلوں میں منگلاکور پہلے اور بہاولپور کور دوسرے نمبر پر رہی۔
آئی ایس پی آر کا مزید کہنا ہے کہ پاک فوج نے شارٹ گن، لانگ رینج اور چھوٹے ہتھیاروں کے مقابلےجیتے جبکہ آرمی چیف نے نشانہ بازوں کی مہارتوں کی تعریف کی۔
اس موقع پر آرمی چیف جنرل قمر جاوید باجوہ نے کہا کہ ایک پیشہ ورجوان کے لیے شوٹنگ میں مہارت طرہ امتیار ہے، شوٹنگ میں مہارت بنیادی فوجی تربیت کا اہم مقصد ہے۔
علاوہ ازیں آرمی چیف جنرل قمر جاوید باجوہ نے میرپور کے قریب جاریکس کینٹ کا بھی دورہ کیا جہاں انہوں نے اے پی ایس جاریکس کا افتتاح کیا۔