سابق گورنرسندھ اور سینئر سیاستدان ممتاز علی خان بھٹو انتقال کرگئے۔ممتاز بھٹو کے ترجمان ابراہیم ابڑو نے ان کے انتقال کی تصدیق کرتے ہوئے بتایا کہ وہ کچھ عرصے سے علیل تھے۔ ترجمان کے مطابق ممتاز بھٹو کا انتقال کراچی میں ان کی رہائش گاہ پر ہوا۔ خیال رہے کہ ممتازبھٹو سابق وزیراعظم ذوالفقار علی بھٹو کے کزن اور قریبی ساتھی تھے۔ وہ پیپلزپارٹی(پی پی پی) کے اولین قائدین میں سے ایک تھے، ممتاز بھٹو سابق وفاقی وزیر، گورنر سندھ اور وزیراعلیٰ کے عہدے پر بھی فائز رہے۔وہ سندھ کے آٹھویں گورنر تھے، مارچ 1977 میں انہوں نے قومی اسمبلی کی نشست جیتی تھی اور وفاقی وزیر بنے تھے۔ ان کی جماعت مسلم لیگ(ن) سے بھی وابستہ رہی تاہم 2014 میں ممتاز بھٹو نے دعویٰ کیا تھا کہ مسلم لیگ (ن) نے اْنہیں بیٹے سمیت پارٹی سے نکال دیا۔ بعدازاں 2017 میں ان کی جماعت سندھ نیشنل فرنٹ نے تحریک انصاف میں ضم ہونے کا اعلان کیا تھا۔