وزیراعلیٰ خیبرپختونخوا کے معاون خصوصی برائے اطلاعات بیرسٹر محمد علی سیف نے کہا ہے کہ خیبرپختونخوا میں معاشی بحران کی ذمہ دار امپورٹڈ حکومت ہے۔
معاون خصوصی بیرسٹر سیف نے خیبرپختونخوا حکومت پر وزیراعظم کے الزامات کا جواب دیتے ہوئے کہا کہ اگر خیبرپختونخوا میں معاشی بحران ہے تو اس کی ذمہ دار امپورٹڈ حکومت ہے۔
انہوں نے کہا کہ خیبرپختونخوا کے وفاق کے ذمے 275 ارب کے واجبات ہیں، امپورٹڈ حکومت این ایف سی کا اجلاس بھی طلب نہیں کر رہی۔
بیرسٹر سیف نے مزید کہا کہ امپورٹڈ وزیراعظم اپنے کپڑے نہیں عوام کی لوٹی دولت سے بنائی اپنی جائیدادیں بیچیں۔
ترقیاتی منصوبوں کو ترجیحی بنیاد پر مکمل کیا جائے گا، شہباز شریف
گزشتہ روز وزیرِ اعظم نے کہا تھا کہ گزشتہ چار سال میں سی پیک منصوبوں کو دانستہ طور پر تعطل کا شکار کیا گیا، قوم ملکی ترقی کے دشمنوں کو پہچان گئی ہے۔
شہباز شریف نے کہا کہ ہم ملک و قوم کے پیسے کی حفاظت کیلئے عوام کو جوابدہ ہیں،حکومت ترقیاتی منصوبوں میں شفافیت کو یقینی بنا رہی ہے۔
ان کا کہنا تھا کہ ترقیاتی منصوبوں خاص کر عوامی نوعیت کے منصوبوں کو ترجیحی بنیادوں پر مکمل کیا جائے گا۔
شہباز شریف کا یہ بھی کہنا تھا کہ چین نے پاکستان کا ہر مشکل وقت میں ساتھ دیا ہے، پاکستان اور چین دیرینہ دوست ہیں جن کے برادرانہ تعلقات دہائیوں پر محیط ہیں۔
انہوں نے کہا کہ حالیہ سیلاب اور بارشوں کے دوران چین کے تعاون پر مجھ سمیت پوری قوم صدرشی جن پنگ اور چینی عوام کی شکر گزار ہے۔
وزیرِ اعظم شہباز شریف نے سی پیک کے تحت منصوبوں کو ترجیحی بنیادوں پر مقررہ مدت میں مکمل کرنے کی ہدایت کی۔