حافظ نعیم الرحمن
امیر جماعت اسلامی کراچی حافظ نعیم الرحمن نے کہا ہے کہ جاگیردار اور وڈیروں کا ٹولہ 14 سال سے سندھ میں حکومت کر رہا ہے۔
تفصیلات کے مطابق حافظ نعیم الرحمن نے شاہراہ قائدین پر احتجاجی دھرنے سے خطاب کرتے ہوئے کہا کہ کراچی کے نوجوانوں کے مستقبل اور جماعت اسلامی کو روکنے کے لیے ہتھکنڈے استعمال کیے جا رہے ہیں۔
‘کراچی کے عوام کی رائے تبدیل ہو رہی ہے’
ان کا کہنا تھا کہ جاگیردار اور وڈیروں کا ٹولہ 14 سال سے سندھ میں حکومت کر رہا ہے، اس ٹولے کو گذشتہ 35 سال سے دوست بھی ملتے رہے جنہوں نے عوام کا مینڈیٹ فروخت کیا، آج کراچی کے عوام کی رائے تبدیل ہوئی ہے تو یہ جماعتیں الیکشن کمیشن کو یرغمال بنا رہے ہیں۔
انہوں نے کہا کہ سندھ حکومت سن لے کہ عوام کا طوفان نہیں روک سکتے، 24 جولائی کو بلدیاتی انتخابات ملتوی کیے تو جماعت اسلامی نے احتجاج کیا ہر گزرتے دن تک جماعت اسلامی کے ووٹرز میں اضافہ ہو رہا ہے، حکمران جماعتیں جماعت اسلامی کی بڑھتی ہوئی مقبولیت سے خوف زدہ ہو رہے ہیں۔
حافظ نعیم نے کہا کہ کراچی کے عوام بنیادی ضروریات سے محروم ہیں، مائیں بہنیں چنگچی رکشوں پر سفر کرنے پر مجبور ہیں، حکومت اور حکمران طبقہ بتائے کہ وہ کس سے خوف زدہ ہیں بلدیاتی انتخابات کیوں ملتوی کر دیے؟
‘سراج الحق اندرون سندھ کے عوام کے درمیان موجود ہیں’
ان کا کہنا تھا کہ امیر جماعت اسلامی پاکستان سراج الحق اندرون سندھ کے عوام کے درمیان موجود ہیں، وزیر اعظم شہباز شریف اور وزیر اعلیٰ سندھ مراد علی شاہ خراب موسم کے باعث اندرون سندھ کے عوام کے پاس تک نہیں گئے، عوام بیدار ہو رہے ہیں، سندھی مہاجر کے نام پر تقسیم ختم ہو چکی ہے۔
انہوں نے کہا کہ شرم کا مقام ہے کہ پورے پاکستان میں فیول ایڈجسٹمنٹ کی مد میں پیسے ختم کر دیے لیکن کراچی میں کہا جاتا ہے کہ کے الیکٹرک ایک پرائیوٹ کمپنی ہے، کے الیکٹرک اگر پرائیوٹ کمپنی ہے تو اس کا حکومت سے معاہدہ طے ہوا ہے؟ حکمران بتائیں کہ کے الیکٹرک نے اپنے کس معاہدے پر عمل کیا، عوام کو کتنا ریلیف دیا؟
حافظ نعیم نے کہا کہ جماعت اسلامی کی عوام میں مقبولیت عوام کی مسائل کے حل کے لیے مزاحمتی تحریک کی وجہ سے ہوئی، حکمران طبقہ کراچی میں انتخابی تحریک کو خراب کرنے کے لیے بار بار ملتوی کر رہے ہیں، جماعت اسلامی محض انتخابی مہم کے لیے کام نہیں کر رہی بلکہ عوام کی خدمت کے لیے اور مسائل کے حل کے لیے ہمیشہ عوام میں موجود رہیں گے۔
‘حکمران انتخابات سے جتنا بھاگیں گے کراچی کے عوام ان کا مزید تعقب کریں گے’
ان کا کہنا تھا کہ حکمران انتخابات سے جتنا بھاگیں گے کراچی کے عوام ان کا مزید تعقب کریں گے، جماعت اسلامی آئینی، جمہوری اور قانونی طور پر بلدیاتی انتخابات ملتوی کرنے کے خلاف زبردست تحریک چلائیں گے، جمعہ کے روز الیکشن کمیشن سندھ کے دفتر کے باہر تاریخی دھرنا دیں گے اور بلدیاتی انتخابات کروانے پر مجبور کریں گے۔