آصف زرداری نے کہا ہے کہ آج ہم اپنے پیارے نبی حضرت محمد ﷺ کی ولادت کی خوشیاں منا رہے ہیں۔
تفصیلات کے مطابق سابق صدر آصف علی زرداری نے جشن عید میلاد النبی ﷺ کے موقع پر پیغام جاری کرتے ہوئے کہا کہ آج ہم اپنے پیارے نبی حضرت محمدﷺ کی ولادت کی خوشیاں منا رہے ہیں، ہم نبی کریم ﷺ کی تعلیمات، برداشت اور ایک دوسرے کو سمجھنے سے دور ہوگئے ہیں، عوام کو جشن منانے کے ساتھ یہ بھی سوچنا ہوگا۔
انہوں نے کہا کہ آج کے دن ہم اللہ تعالیٰ سے یہ دعا بھی مانگتے ہیں کہ ہمیں اجتماعی شعور عطا کرے اور جو پیغام محبت، برداشت اور انکساری کا اسلام نے ہمیں دیا ہے ہم اس پر عمل کریں۔
ان کا کہنا تھا کہ ہمارے پیارے نبیﷺ نے ہمیں جو تعلیمات دی ہیں وہ سب سے عظیم تعلیمات ہیں، آج ہمیں ان تعلیمات پر جتنا عمل کرنے کی ضرورت ہے پہلے کبھی نہیں تھی۔
سابق صدر آصف علی زرداری نے مزید کہا کہ اللہ تعالیٰ ہمیں شعور عطا کرے، ہمیں اسلامی تعلیمات پر پوری طرح سے عمل کرنے کے لئے رہنمائی کرے اور ہمارے دلوں کو اسلام کی تعلیمات سے منور کر دے۔