عمران خان نے کہا ہے کہ کراچی کے شہریوں کی تکلیف اور پریشانی سے میں زیادہ واقف ہوں۔
تفصیلات کے مطابق چیئرمین پی ٹی آئی عمران خان سے پی ٹی آئی رہنماء عمران اسماعیل، نو منتخب ایم این اے محمود مولوی کی ملاقات ہوئی جس میں میں پی ٹی آئی رہنماء زبیر گیلانی بھی موجود تھے۔
ملاقات میں عمران خان نے محمود مولوی کو کامیابی اور عمران اسماعیل کو کامیاب مہم چلانے پر مبارکباد دی۔
اس موقع پر چیئرمین پی ٹی آئی عمران خان نے کہا کہ این اے 245 کی مہم میں حصہ لینے والے تمام انصافین کو مبارکباد پیش کرتا ہوں، این اے 245 کی عوام کا بھی شکریہ ادا کرتا ہوں انہوں نے ہمارا ساتھ دیا۔
عمران خان نے یہ بھی کہا کہ کراچی کے عوام نے ہمیشہ تحریک انصاف کا ساتھ دیا ہے، کراچی کے باشعور لوگ اپنا بہتر مستقبل تحریک انصاف کو سمجھتے ہیں۔
ان کا کہنا تھا کہ کراچی پر حکمرانی کرنے والوں نے شہر کی روشنیاں اجاڑدی ہیں، کراچی کے شہریوں کی تکلیف اور پریشانی سے میں زیادہ واقف ہوں۔
عمران خان نے کہا کہ حقیقی آزادی کے لیے کراچی کے لوگوں کا جوش کبھی نہیں بھول سکتا، کراچی کے لوگ سب سے زیادہ میرے دل کے قریب ہیں۔
انہوں نے یہ بھی کہا کہ میں جلد کراچی آکر کراچی کے لوگوں کا شکریہ ادا کروں گا اور ہم کراچی کو واپس روشنیوں اور معاشی حب شہر بنائیں گے۔
چیئرمین پی ٹی آئی عمران خان نے مزید کہا کہ بلدیاتی الیکشن میں بھی کراچی کی عوام تحریک انصاف کے نمائندوں پر اعتماد کا اظہار کرے، ہم اس شہر کو مضبوط اور بااختیار بلدیاتی نظام دیں گے۔