شاہ محمود قریشی نے کہا ہے کہ کراچی انتخاب میں تمام جماعتوں کو عبرتناک شکست ہوئی ہے۔
تفصیلات کے مطابق سابق وزیر خارجہ شاہ محمود قریشی نے میڈیا سے گفتگو کرتے ہوئے کہا کہ میں ایک اہم موضوع پر بات کرنا چاہتا ہوں، پنجاب میں ضمنی انتخابات میں عوام نے اپنا فیصلہ دے دیا تھا اور اب کراچی میں بھی عوام نے اپنا فیصلہ سنا دیا ہے۔
انہوں نے کہا کہ یہ جماعتیں عمران خان سے کیوں گھبراتی ہیں، یہ عمران خان کے خوف سے سب جماعتیں اکھٹی ہوئی ہیں جبکہ شہباز شریف، آصف زرداری گھبرا گئے ہیں، میری اطلاع کے مطابق بنی گالہ کی بتیاں گل ہوچکی ہیں۔
شاہ محمود قریشی کا کہنا تھا کہ میڈیا کے چینلز کیوں بند ہوگئے؟ سوشل میڈیا کے زمانے میں یہ سب ممکن نہیں، ہم عوامی عدالت میں جا رہے ہیں اور ہم عدالتوں سے بھی رجوع بھی کر رہے ہیں۔
سابق وزیر خارجہ کا یہ بھی کہنا تھا کہ عمران خان کو شاید گرفتار کیا جائے لیکن حکومت عمران خان کو گرفتار کرنے کی حماقت نہیں کرے گی، ہم نے عمران خان کو کہا تھا راوالپنڈی میں قیام کرے، عمران خان نے کہا نہیں میں بنی گالہ جاؤں گا۔
انہوں نے کہا کہ پیپلزپارٹی کی سندھ میں حکومت ہے لیکن عوام عمران خان کے بیانیے کے ساتھ ہے، کراچی انتخاب میں تمام جماعتوں کو عبرتناک شکست ہوئی ہے۔
شاہ محمود قریشی نے یہ بھی کہا کہ شہباز شریف پاکستان کی معیشت کو نقصان پہنچائے گے ، شہباز شریف کو وارن کر رہا ہوں اگر کوئی نقصان ہوا تو ذمے دار شہباز شریف اور آصف زرداری ہونگے۔
ان کا کہنا تھا کہ ہم پر امن لوگ ہیں، تحریک انصاف کے کارکنان تیار رہے، کل عمران خان نے اہم اجلاس اسلام آباد میں طلب کیا ہے، اجلاس کے پی کے ہاؤس میں ہوگا۔
سابق وزیر خارجہ شاہ محمود قریشی کا مزید کہنا تھا کہ اسلام آباد اور راوالپنڈی کے لوگ عمران خان کی حفاظت کرے، عمران خان محب وطن ہیں اور اگر کوئی نجات دہندہ ہے تو وہ عمران خان ہے، میں اسلام آباد کے لیے روانہ ہو رہا ہوں، انشااللہ امید ہے کل عمران خان سے ملاقات ہوگی۔