پاک فوج کی گاڑی کو شجاع آباد کے قریب افسوسناک حادثہ پیش آیا جس کے نتیجے میں 9 جوان شہید اور 4 زخمی ہوگئے۔
پاک فوج کے شعبہ تعلقات عامہ (آئی ایس پی آر) کے مطابق پاک فوج کی گاڑی کو باغ کے علاقے شجاع آباد کے قریب افسوسناک حادثہ پیش آیا، گاڑی فوجی ڈیوٹی کے دوران ایک نالے میں گر گئی۔
آئی ایس پی آر کا کہنا ہے کہ حادثے میں 9 فوجی شہید اور 4 زخمی ہوگئے ، زخمیوں کو فوری طور پر سی ایم ایچ راولپنڈی منتقل کر دیا گیا ہے۔
آئی ایس پی آر کا مزید کہنا ہے کہ تمام شہداء کی نماز جنازہ منگلا گیریژن میں ادا کردی گئی ، کور کمانڈر راولپنڈی لیفٹیننٹ جنرل ساحر شمشاد مرزا اور دیگر فوجی حکام نے نماز جنازہ میں شرکت کی۔ شہدا کے جسد خاکی اپنے اپنے آبائی علاقوں میں روانہ کر دیے گئے۔
پاک فوج کی گاڑی کو حادثہ ، وزیراعظم کا افسوس کا اظہار
وزیراعظم شہباز شریف نے آزاد کشمیر کے علاقے باغ کے قریب فوجی گاڑی کو حادثے پر رنج و غم اور افسوس کا اظہار کیا ہے۔
شہباز شریف نے 9 شہید ہونے والے جوانوں کے اہل خانہ سے ہمدردی کا اظہار کیا اور کہا کہ مادر وطن کے دفاع کا عظیم فرض نبھاتے شہید ہونے والے بیٹوں کو قوم سلام پیش کرتی ہے
وزیراعظم شہباز شریف نے شہداء کے بلندی درجات اور لواحقین کے لئے صبر جمیل کی دعا کی جبکہ وزیراعظم نے زخمی جوانوں کی جلد صحت یابی کیلئے بھی دعا کی۔