شارٹ ویڈیو شیئرنگ ایپلی کیشن ٹک ٹاک نے لبنانی نژاد اسپورٹس اینکر، ماڈل و اداکار میا خلیفہ کے اکاؤنٹ کو پاکستان میں غیر فعال کردیا، جس کے بعد اداکارہ نے پاکستانی مداحوں کے لیے ٹوئٹر پر مواد اپ لوڈ کرنے کا اعلان کردیا۔
ٹک ٹاک نے عدالتی و حکومتی احکامات کے بعد گزشتہ چند ماہ میں پاکستان سے جہاں فحش اور نازیبا مواد کی ویڈیوز کو ہٹا دیا تھا، وہیں ٹک ٹاک نے بعض ایسے غیر ملکی اکاؤنٹس کو بھی پاکستان میں غیر فعال کردیا، جن پر قابل اعتراض مواد اپ لوڈ ہوتا ہے۔
یہ واضح نہیں ہے کہ ٹک ٹاک نے خود میا خلیفہ کا اکاؤنٹ غیر فعال کیا یا پھر پاکستان ٹیلی کمیونی کیشن (پی ٹی اے) نے اداکارہ کے اکاؤنٹ کو بند کیا۔
تاہم گزشتہ روز ایک صارف نے میا خلیفہ کو آگاہ کیا کہ پاکستان میں ان کا ٹک ٹاک اکاؤنٹ بند کردیا گیا ہے۔
فرضی نام سے بنے ٹوئٹر ہینڈل سے 23 مئی کو میا خلیفہ کو مینشن کرتے ہوئے ٹوئٹ کی گئی کہ لبنانی نژاد اداکارہ کا ٹک ٹاک اکاؤنٹ پاکستان میں بند کردیا اور ساتھ ہی انہوں نے ایسے قدم کو نفرت پر مبنی قدم بھی قرار دیا۔
بعد ازاں میا خلیفہ نے مذکورہ صارف کی ٹوئٹ کو ری ٹوئٹ کرتے ہوئے اعلان کیا کہ وہ پاکستانی صارفین کے لیے ٹوئٹر پر مواد اپ لوڈ کریں گی۔
میا خلیفہ نے ٹوئٹ کی کہ پاکستان میں ان کا ٹک ٹاک اکاؤنٹ بند کردیا ہے، اس لیے اب سے وہ ٹک ٹاک والا مواد پاکستانی مداحوں کے لیے ٹوئٹر پر اپ لوڈ کریں گی۔
میا خلیفہ کی جانب سے اپنا مواد ٹوئٹر پر اپ لوڈ کرنے کے اعلان کے بعد متعدد پاکستانیوں نے ان کی ٹوئٹ پر کمنٹس کیے اور انہیں بتایا کہ وہ اس ضمن میں پریشان نہ ہوں، پاکستانی مداح ورچوئل پرائیویٹ نیٹ ورک (وی پی این) کا استعمال کرکے ان کا مواد دیکھیں گے۔
بعض لوگوں نے میا خلیفہ کو بتایا کہ نہ صرف ان کا اکاؤنٹ بلکہ پاکستان میں متنازع مواد والے دیگر ٹک ٹاک اکاؤنٹس کو بھی غیر فعال کردیا گیا ہے۔
کچھ مداحوں نے انہیں بتایا کہ انہیں غلط معلومات دی گئی ہے اور ان کا اکاؤنٹ پاکستان میں بھی چل رہا ہے۔
کچھ لوگوں نے میا خلیفہ کی ٹوئٹ پر مزاحیہ کمنٹس کرتے ہوئے پاکستان مسلم (ن) کے جلسوں میں لگائے جانے والے نعروں ’میاں تیرے جان نثار، بے شمار بے شمار‘ کی ویڈیو شیئر کرتے ہوئے انہیں یقین دلایا کہ پاکستانی ان کے لیے ہمدری کا اظہار کرتے ہوئے ان کے لیے جان کی قربانی دینے کو بھی تیار ہیں۔