عمران خان کو اپنی سیاست کی فکر ہے سیلاب زدگان کی نہیں، عطا تارڑ

معاون خصوصی عطا تارڑ نے کہا ہے کہ عمران خان ریاست پر حملے کررہے ہیں انہیں اپنی سیاست کی فکر ہے سیلاب زدگان کی نہیں ۔

معاون خصوصی عطا تارڑ نے پریس کانفرنس کرتے ہوئے کہا کہ عمران خان نے سیاست چمکانے کے لیے ریاست کو داؤ پر لگایا ہے۔

انہوں نے کہا کہ آڈیو لیکس میں کہا گیا کہ سائفر کو استعمال کرنا اور کھیلنا ہے اور امریکا کا نام  نہیں لینا ۔

انہوں نے مزید کہا کہ چوکیدار کا قصور نہیں آپ کی چوری کا قصور ہے، آپ کی چوری پر پردہ نہیں ڈال سکے کہ آپ نے چار سال جو چوری کا بازار گرم رکھا اور یہ سب جانتے ہیں۔

عطا تارڑ نے کہا کہ عمران خان کو بتاتا چلوں یہ وہی چوکیدار ہے جو سیاچن سے بلوچستان کے سرحدوں تک حفاظت کرتاہے لیکن عمران خان کو لگتاہے اداروں پر بہتان لگائیں گےاور انہیں کوئی نہیں پوچھےگا۔

ان کا کہنا تھا کہ اسدعمر کہتے ہیں کہ وزیراعظم ہاؤس سے سائفر گم گیا، عمران خان کے پاس سے سائفر کہاں گیا؟ سائفر تو عمران خان کی جیب میں ٹھا، گم کیسے گیا؟۔

انہوں نے بتایا کہ عمران خان سائفر کے معاملے میں جھوٹ بول رہے ہیں۔