گورنر سندھ کامران خان ٹیسوری نے کہا ہے کہ بھارت کو 1987 میں بھارت میں ہرانے میں توصیف احمد کی آف اسپن بولنگ نے اہم کردار ادا کیا ہے۔
تفصیلات کے مطابق گورنر سندھ کامران خان ٹیسوری سے پاکستان کے سابق لیجنڈ آف اسپنر توصیف احمد کی ملاقات ہوئی ہے جس میں نواب عالم بھی ان کے ہمراہ موجود تھے۔
ملاقات میں نوجوان کرکٹرز کی تربیت، باصلاحیت کرکٹرز کی تلاش کے لئے ٹیلنٹ ہنٹ کیمپ کے انعقاد اور کرکٹ کے فروغ کے دیگر اقدامات پر تبادلہ خیال کیا گیا۔
گورنر سندھ کامران خان ٹیسوری نے کہا کہ 1986 کے آسٹریلیشیا کپ کی فتح میں توصیف احمد کا بھی نمایاں کردار ہے۔
انہوں نے کہا کہ بھارت کو 1987 میں بھارت میں ہرانے میں توصیف احمد کی آف اسپن بولنگ نے اہم کردار ادا کیا جبکہ پاکستان کے اسپنرز میں بھی توصیف احمد کو ہمیشہ نمایاں مقام حاصل رہے گا۔
اس موقع پر سابق لیجنڈ آف اسپنر توصیف احمد کا کہنا تھا کہ نوجوان بولرز کی تربیت کرکے خوشی ہوگی جبکہ صوبہ میں کرکٹ کے فروغ کے لئے گورنر سندھ کی دلچسپی خوش آئند ہے۔